පාසල් සිසුවෙකුට වල් ඌරෙකු යැයි සිතා වෙඩි තබා මරාදැමූ අයෙකුට ලැබුණු දේ.

Report
7Shares

තම පියාට අයත් හේනක තම සොහොයුරා සමඟ කජු පුහුලන් ඇහිඳිමින් සිටි 16 හැවිරිදී පාසල් සිසුවකුට වල් ඌරෙකු යැයි සිතා වෙඩි තබා එම සිසුවා මරණයට පත් කිරීෙම් සිද්ධියක් සම්බන්ධයෙන් අනුරාධපුර මහාධිකරණය හමුවේ අධි චෝදනා ලබා සිටි ගොවියකු එකී චෝදනාවට වරදකරු බවට නිගමනය කළ උතුරු මැද පළාත් බද මහෝධිකරණයේ පූර්වගාමි විනිසුරු සහ පානදුර පළාත් බද මහාධිකරණ විනිසුරු මහේෂ් වීරමන් මහතා ඔහුට වසර විස්සක බරපතළ වැඩ සහිත සිර දඩුවමක් නියම කළ පුවතක් වාර්තා වනවා.

මෙසේ දඩුවම් නියම වූයේ ඇලයාපත්තුව දිගනේගම පදිංචි ඩබ්.එම්. විජේදාස නමැති 55 හැවිරිදි හේන් ගොවියෙකුටයි.

2009 වසරේ අප්‍රේල් මස 22 වැනි දින හෝ ඊට ආසන්න දිනයක අනුරාධපුර මහාධිකරණ බල ප්‍රදේශයට අයත් ඇලයාපත්තුව දිගනේගමදී 16 හැවිරිදි ඒ.ඒ. ප්‍රදීප් හර්ෂ කුමාර නමැති සිසුවෙකුට වෙඩි තබා ඔහු මරා දැමීයැයි නීතිපතිවරයා විසින් ඔහුට එරෙහිව අනුරාධපුර මහාධිකරණය හමුවේ අධි චෝදනා ගොනු කර තිබිණ.

විත්තිකරුට විසි වසරක සිර දඬුවම් නියම කරමින් මහාධිකරණ විනිසුරු මහේෂ් වීරමන් මහතා සඳහන් කළේ විත්තිකරුට එරෙහිව පැමිණිල්ල විසින් නගා ඇති චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශවය සමත්ව ඇති බවයි.

ඒ අනුව විත්තිකරුට විසි වසරක බරපතළ වැඩ සහිත සිර දඬුවමක් නියම කරන බවද මහාධිකරණ විනිසුරු මහේෂ් වීරමන් මහතා කීවේය.

2009 වසරේ අප්‍රේල් මස 22 වැනි දින සවස 6.30 ත් 7 ත් අතර රාත්‍රිය උදාවෙන්නට ආසන්න වෙත්ම ප්‍රදීප් හර්ෂ කුමාර නැමැති 16 හැවිරිදි මෙම පාසල් සිසුවා තම පියාට අයත් හේනක කජු ගසකින් කජු පුහුලන් ඇහීඳීමට සිය බාල සොහොයුරා සමඟ ගොස් ඇති බවත්, එසේ ගොස් හේනේ කජු ගසක් යට කජු පුහුලන් ඇහිඳිමින් සිටි අවස්ථාවේ වන සතුන් දඩයමේ ගොස් ඇති මෙම විත්තිකරු වල් ඌරෙකු යැයි සිතා මෙම පාසල් සිසුවාට වෙඩි තබා ඇති බවත් අධිකරණ නඩු විභාගයේදී අනාවරණය විය.

වල් ඌරෙකු යැයි සිතා තමා වෙඩි තබා ඇත්තේ ළමයෙකුට බව මෙම විත්තිකරු දැන ගෙන ඇත්තේ වෙඩි තැබීමත් සමඟ මෙම ළමයා සහ ඔහුගේ සහෝදරයා කෑගැසූ අවස්ථාවේ බවද අධිකරණ නඩු විභාගයේදී තවදුරටත් හෙලි විය.

වෙඩි තැබීමෙන් මරණයට පත් ප්‍රදීප් හර්ෂ කුමාර සිසුවා ඒ වන විට අනුරාධපුර ඇලයාපත්තුව දිගනේගම විද්‍යාලයෙන් අධ්‍යාපනය ලබා අ.පො.ස. සාමන්‍ය පෙළ විභාගයට පෙනී සිට ඉන් සමත්ව අනුරාධපුර වලිසිංහ හරිශ්චන්ද්‍ර මහ විද්‍යාලයෙන් උසස් පෙළ අධ්‍යාපනය ලැබීමට සුදානම්ව සිට ඇත.

සිසුවාට වෙඩි තබා ඔහු මරණයට පත් කිරීමේ වරදට විසි වසරක බරපතළ වැඩ සහිත සිර දඩුවම් නියම වූ ඩබ්.එම්. විෙජ්දාස නමැති මෙම හේන් ගොවියා මරණයට පත් සිසුවාගේ පියාගේ ඉතා සමීප මිතුරෙකු වන අතර හේන් ගොවිතැන් කටයුතු සිදු කර ඇත්තේද ඔවුන් දෙදෙනා එකටය.

මෙම නඩුවේ ලඝු නොවන මූලික විභාගය අනුරාධපුර මහේස්ත්‍රාත් අධිකරණයේදී පැවති අතර විත්තිකරුට අධිචෝදනා බාර දීමෙන් අනතුරුව එය වැඩිදුර විභාගය සඳහා අනුරාධපුර මහාධිකරණයට යොමු කර තිබිණ.

පැමිණිල්ල වෙනුවෙන් රජයේ අධිනීතීඥ පද්මාල් ද සිල්වා මහතා පෙනී සිටි අතර විමර්ශන මෙහෙයවූ අනුරාධපුර මූලස්ථාන පොලිසිය වෙනුවෙන් මූලස්ථාන ප්‍රධාන පොලිස් පරික්ෂක සංජීව මහනාම මහතාගේ උපදෙස් මත සැරයන් (47965) සරත් ගුණසේන මහතා පෙනී සිටියේය. විත්තිකරු වෙනුවෙන් නීතීඥ ආනන්ද ප්‍රේමරත්න මහතා පෙනී සිටියේය.

-