ශ්‍රී ලංකාවට ජිනීවා හිදී තවත් කල් දීම ලෝකයට යුද අපරාධ සඳහා “පාර කපා දීමක්”

Report
4Shares

පෙත්සම අත්සන් කරමින්

දස වසරක් තිස්සේ බලා සිටි තමන්ට යුක්තිය සැලසීම සඳහා දුන් පොරොන්දු ඉටු කිරීමට ශ්‍රී ලංකාවට තවත් කල් දීම ලෝකයේ වෙනත් රටවලට බියකින් තොරව යුද අපරාධ කිරීම සඳහා “පාර කපා දීමක්” ලෙස යුද පීඩිත කලාපයේ සංවිධාන කිහිපයක් ජාත්‍යන්තර බලවතුන්ට අනතුරු අඟවා තිබේ.

අතුරුදහන්වුවන්ගේ දෙමළ මව්වරුන්ගේ සංවිධානය ප්‍රමුඛ සංවිධාන 26 ක් මුල්වී විදේශීය දූත මණ්ඩල වලට බාර දෙන ලද මහජන සංදේශයකින් ඉල්ලා ඇත්තේ ශ්‍රී ජගත් මානව හිමිකම් සමුළුවේදී දුන් වගවීම පිලිබඳ පොරොන්දු සපුරා ලීම සඳහා ලංකාවේ ආණ්ඩුවට තවත් කල් නොදී ජාත්‍යන්තර අපරාධ අධිකරණයට යොමු කරන ලෙසයි.

“ශ්‍රී ලංකාවට තවත් කල් දීම අසාර්ථක මුල පිරීමක් වන අතර අපට එරෙහි උල්ලංඝන දිගටම සිදු කරමින් යුද අපරාධ සම්බන්ධ තීරණාත්මක සාක්ෂි වසං කොට විනාශ කිරීමට ආරක්ෂක අංශ වලට ලබා දෙන තවත් දිරි දීමක් වනු ඇත,” යි උතුරු හා නැගෙනහිර සංවිධාන එක්ව බාර දෙන ලද සංදේශයේ සඳහන් වෙයි.

“එමෙන්ම එය ලෝකයේ වෙනත් රටවලටත් ශ්‍රී ලංකාවේ මාර්ගය අනුගමනය කරමින් වගවීමෙන් ගැලවීමට හැකියාව ලැබෙන බවට පූර්ණ අවබෝධයකින් යුතුව, කිසිදු බියකින් තොරව යුද අපරාධ සහ මානව වර්ගයාට එරෙහි අපරාධ කිරීම සඳහා පාර කපා දීමකි.”

යුද අපරාධ ඇතුළු මානව හිමිකම් උල්ලංඝන සම්බන්ධයෙන් යුක්තිය ඉටු කිරීම සඳහා ජිනීවාහි 2015 එක්සත් ජාතීන්ගේ මානව හිමිකම් මණ්ඩල සමුළුවේ දී හවුලේ සම්මත කරගත් යෝජනාවකින් ගිවිසගත් පොරොන්දු ඉටු කිරීමට ශ්‍රී ලංකාවට කල් දී තිබු අවුරුදු හතරක කාලය මේ මාර්තුවෙන් අවසන් වෙයි.

එම පොරොන්දු ඉටු කිරීමට තවත් කල් දීම මගින් සිදුවන්නේ ආණ්ඩුවේ “සත්‍ය හා සංහිඳියා උගුලේ” වැටී දෙමළ ජනතාවට සදහට යුක්තිය අහිමි කිරීමකැ’යි අනතුරු අඟවන මහජන පෙත්සම, ශ්‍රී ලංකාව ජාත්‍යන්තර අපරාධ අධිකරණයට යොමු කරන ලෙසත්, රටේ යුද පීඩිතයන්ගේ සහ මානව හිමිකම් වල තත්වය සෑම හය මසකට වතාවක් ජගත් මණ්ඩලයට වාර්තා කිරීම සඳහා දිවයිනට එක්සත් ජාතීන්ගේ විශේෂ නියෝජිතයකු පත් කරන ලෙසත් යෝජනා කර සිටී.