පාස්කු ප්‍රහාරකයන් හොයන මෙහෙයුම් නායකත්වයේ යුද අපරාධ චූදිත සෙන්පතියන්: වාර්තාවක්

Report
5Shares

පාස්කු ඉරුදින ප්‍රහාරයෙන් පසු දිවයිනේ සෝදිසි මෙහෙයුම් සඳහා පිහිටුවන ලද අලුත්ම බලඇණියේ නායකත්වයට යුද අපරාධ චෝදනා එල්ලවන සෙන්පතියන් පිරිසක්ද පත්කර ඇති බව ජාත්‍යන්තර වාර්තාවකින් පෙන්වා දී තිබේ.

ඒ අතර සාමසාධක මෙහෙයුම් වල යෙදී සිටියදී බාල දරු දැරියන් කෙලෙසූ වගට එක්සත් ජාතීන්ගේ විමර්ශනයකින් හෙළිවූ යුද සෙබළුන්ට අණදුන් නිලධාරීන්ද ඉන්නා බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සහ ශ්‍රී ලංකාවේ සත්‍යය සහ යුක්තිය සඳහා වන ව්‍යාපෘතිය (ITJP) විසින් ප්‍රකාශයට පත්කර ඇති අලුත්ම ඒකාබද්ධ වාර්තාවේ විස්තර වෙයි.

දෙසිය පනහකට වැඩි පිරිසක් මරණයට පත්වූ පාස්කු බෝම්බ ප්‍රහාර මාලාවෙන් දෙසතියකට පසු ස්ථාපනය කරන ලද ඒකාබද්ධ මෙහෙයුම් මුලස්ථානයට (OOC) බස්නාහිර පලාතේ සහ පුත්තලම් දිස්ත්‍රික්කයේ යුද, නාවික, ගුවන් හමුදා සහ පොලිස් බලඇණි සියල්ල ඇතුලත් වන බව ශ්‍රී ලංකා යුද හමුදාව විසින් නිවේදනය කර තිබුනි.

නිවාස හා ගොඩනැගිලි පරීක්ෂාකොට අත්පත් කරගැනීම, ඇඳිරි නීතිය පැනවීම සහ සාමාන්‍ය ජනතාව වෙසෙන පෙදෙස් වල මුර සංචාර ඇතුළු එම මෙහෙයුම් සඳහා දහස් සංඛ්‍යාත භට සේනාවක් යොදවා ඇතැයි යුද හමුදාව පවසයි.

මෙම මෙහෙයුම් වැඩි වශයෙන් සිද්ධවන්නේ මුස්ලිම් වාසස්ථාන හා ව්‍යාපාර ආශ්‍රිතව බව යුද හමුදාපතිවරයා මාධ්‍යවේදීන් හමුවේ ප්‍රකාශ කර තිබුනි.

ඒකාබද්ධ මෙහෙයුම් මුලස්ථානයේ ආඥාපති ලෙස පත්කර ඇත්තේ යුද අපරාධ සම්බන්ධයෙන් එක්සත් ජාතීන්ගේ වාර්තාවක නම් කොට ඇති තුන්වැනි කාර්ය සාධක බලකායේ යුද සමයේ අණදෙන නිලධාරි මේජර් ජෙනරාල් සත්‍යප්‍රිය ලියනගේය.

ඔහු ඇතුළු ඒකාබද්ධ මෙහෙයුම් මුලස්ථාන නායකත්වයට පත් කර ඇති යුද අපරාධ ඇතුළු මානව හිමිකම් උල්ලංඝන සම්බන්ධ චෝදනා ලබන නිලධාරීන් අට දෙනකුගේ නම් සහ ඡයාරූප JDS-ITJP ඒකාබද්ධ වාර්තාවේ පල කොට තිබේ.

ඒ අතරින් අරුණ ජයසේකර සහ මහින්ද මුදලිගේ මේජර් ජෙනරාල් දෙපල හයිටියේ ළමා ලිංගික අපචාර චෝදනාවට ලබන ශ්‍රී ලාංකික සාමසාධක බලඇණිවල ඉහල නිලතල දැරුවන්ය. එම අපචාර සම්බන්ධයෙන් විභාග කළ මේජර් ජෙනරාල් කුමුදු පෙරේරා ද ඒකාබද්ධ මෙහෙයුම් මණ්ඩලයේ අණදෙන නිලධාරියෙකි.

එක්සත් ජාතීන්ගේ සංවිධානය විසින් නීතිවිරෝධී රඳවා තබා ගැනීමක් ලෙස හඳුන්වා තිබෙන එල්ටීටීඊ සාමාජිකයන් පුනරුත්ථාපනය කිරීමේ කොමසාරිස් ලෙස කටයුතු කළ මේජර් ජෙනරාල් දර්ශන හෙට්ටිආරච්චිද JDS-ITJP ඒකාබද්ධ වාර්තාවේ නම දැක්වෙන සෙන්පතියෙකි.

එම වාර්තාවේ සඳහන් අනික් තිදෙනා වන්නේ යුද අපරාධ සහ මානව හිමිකම් කෙලෙසීම සම්බන්ධයෙන් එක්සත් ජාතීන් විසින් නම් කොට තිබෙන බලඇණි වලට අණ දුන් විජිත රවිප්‍රිය, දුෂ්‍යන්ත රාජගුරු සහ ලක්සිරි වඩුගේ යන මේජර් ජෙනරාල්වරුන් තිදෙනායි.

එම අටදෙනාගේ සෘජු අණදීම යටතේ පන්දහසකට අධික භට පිරිසක් යොදවා තිබෙන බව ශ්‍රී ලංකා යුද හමුදාව නිවේදනය කර තිබේ.