“තව්හිද් ජමාද් සහ පොලිසිය වැඩ කළේ එකට” අසාද් සාලි | VIDEO

Report
2Shares

කාත්තන්කුඩියේ සහරාන් විරෝධී උද්ඝෝෂණය 2017

පාස්කු ඉරුදින ප්‍රහාරය සම්බන්ධයෙන් චෝදනා ලබන දැඩි මතධාරී සංවිධානයට විරුද්ධව මුස්ලිම්වරුන් කලක සිට කළ පැමිණිලි නොතකා හරින ලද බවට නැගුනු චෝදනාව මුස්ලිම් ප්‍රජා නායකයකු විසින් නැවත වතාවක් තහවුරු කර තිබේ.

250 කට වැඩි පිරිසකට මරු කැඳවමින් අප්‍රේල් 21දා දියත් කෙරුනු පිපිරවීම් මාලාව සම්බන්ධයෙන් විභාග කර වාර්තා කිරීම සඳහා කතානායක විසින් පත් කරන ලද පාර්ලිමේන්තු විශේෂ කාරක සභාවේ සාක්ෂි දුන් බස්නාහිර පළාතේ හිටපු ආණ්ඩුකාර අසාද් සාලි “තව්හිද් ජමාද් සහ පොලිසිය වැඩ කළේ එකට” යනුවෙන් කියා සිටියේය.

ජාතික තව්හිද් ජමාද් (NTJ) සංවිධානයේ නායක සහරාන් හෂීම් 2017 දී පාරම්පරික මුස්ලිම්වරුන්ගේ නිවාස 120 ක් ගිනිබත් කළ අවස්ථාවේ ඔහු අත් අඩංගුවට ගන්නා ලෙස උද්ඝෝෂණය කළ ප්‍රදේශවාසීන්ගේ ඉල්ලීම ඉටු කිරීමට වීරිය කළ පොලිස් ස්ථානාධිපතිවරයකු මාරුකර යැවීම ඊට උදාහරණයක් ලෙස හිටපු ආණ්ඩුකාරයා විසින් පෙන්වා දෙන ලදී.

ඒ සම්බන්ධයෙන් පොලිස්පතිවරයාට ලිඛිතව දන්වා යවා තිබුනද කිසිදු පලදායි ප්‍රතිචාරයක් නොලද බව ඔහු ප්‍රකාශ කළේය.

NTJ සංවිධානයෙන් බෙදී වෙන්වී පිහිටුවා ගන්නා ලද ශ්‍රී ලංකා තව්හිද් ජමාද් (SLTJ) සංවිධානයද හිටපු ආරක්ෂක ලේකම් ගෝඨාභය රාජපක්ෂගේ මෙහෙයවීමෙන් පිහිටුවාගන්නා ලද්දක් බව පැවසූ අසාද් සාලි, එක්සත් ජාතීන්ගේ මානව හිමිකම් කොමිසම ශ්‍රී ලංකාව සම්බන්ධයෙන් පියවර ගැනීමට එරෙහිව විරෝධතා පැවැත්වීමට එම සංවිධානය යොදා ගන්නා ලද බව කියා සිටියේය.

මාරාන්තික පාස්කු බෝම්බ ප්‍රහාර මාලාවේ වගකීම බාර ගන්නා ලද්දේ ISIS සංවිධානය විසිනි.

ISIS සංවිධානය සහ එහි නායක අල් බග්දාදි ප්‍රශංසාවට ලක් කරමින් SLTJ නායක අබ්දුල් රාසික් විසින් පවත්වන ලද දේශන රැගත් වීඩියෝ දර්ශන ද විශේෂ කාරක සභාව හමුවේ ඉදිරිපත් කළ හිටපු ආණ්ඩුකාරයා “අබ්දුල් රාසික් ඔත්තු සේවාවට ආධාර කළ” බව පවසා ඔහු අත් අඩංගුවට ගැනීම වලකා ලන බව කියා සිටියේය.

මෙම සංවිධාන දෙකෙන් එල්ලවිය හැකි තර්ජනය සම්බන්ධයෙන් ඉහලම ආරක්ෂක බලධාරීන්ට මෙන්ම ජනාධිපතිවරයාටත් කල් තියා අනතුරු අඟවා ඇති බව හිටපු ආණ්ඩුකාර අසාද් සාලි පාර්ලිමේන්තු විශේෂ කාරක සභාව හමුවේ කිහිප වර කියා සිටියේය.

ඔහු පවසන පරිදි, ශ්‍රී ලංකාවේ තව්හිද් ජමාද් සංවිධාන පිහිටුවීමට මුල්වී ඇත්තේ චන්ද්‍රිකා බණ්ඩාරනායක පාලන සමයේ පිටුවහල් කරන ලද තමිල්නාඩුවේ පී ජේ සෙයිනුලාබ්දීන් ය.

කාත්තන්කුඩියේ සහරාන් විරෝධී උද්ඝෝෂණය 2017