TNA ජනාධිපතිවරණය වර්ජනය කරනු ඇති බවට සැකයක්

Report
3Shares

ශ්‍රී ලංකාවේ රාජ්‍ය පාලනයේ මූලික වෙනස්කම් කිරීම සඳහා දී ඇති ජනතාවරමට පිටුපා ඇති ප්‍රධාන පක්ෂ වලින් මීළඟ ජනාධිපතිවරණයට ඉදිරිපත් කරන කිසිදු තරගකරුවකුගේ ජයග්‍රහණය වෙනුවෙන් පාර්ලිමේන්තුවේ විශාලතම දෙමළ දේශපාලන පක්ෂයේ දායකත්වය නොලැබී යා හැකි බවට සැක පහළවී තිබේ.

මහින්ද රාජපක්ෂගේ නායකත්වයෙන් යුත් ශ්‍රී ලංකා පොදුජන පෙරමුණේ අපේක්ෂකයා ලෙස ගෝඨාභය රාජපක්ෂ තෝරාපත් කරගැනීමට පසුදා යුරෝපා සංගමයේ ඉහළ නියෝජිත පිරිසක් හමුවේ දෙමළ ජාතික සන්ධාන (TNA) නායකත්වය කොළඹදී පවසා ඇත්තේ ජනාධිපතිවරණ ක්‍රියාදාමයට හවුල් වීම ජනතා තීන්දුවට එරෙහිව යාමක් බවයි.

යුද්ධයෙන් පසු මුල්ම ජනාධිපතිවරණය පැවැත්වූ 2010 දී හිටපු හමුදාපති සරත් ෆොන්සේකාට ඡන්ද ලබා දීම වෙනුවෙන් වෙහෙසුනු TNA නායකත්වය 2015 දී මෛත්‍රිපාල සිරිසේන බලයට පත් කිරීමේ තීරණාත්මක බලවේගයක් ලෙස උතුරු නැගෙනහිර ජනතාවගේ ඡන්දය ලබා ගැනීමට මැදිහත් විය.

ඉකුත් විසිපස් අවුරුද්ද පුරාම ජනතාව ඡන්දය දී ඇත්තේ විධායක ජනාධිපති ධුරය අහෝසි කිරීමට යැයි යුරෝපා සංගම් නියෝජිතයන්ට පෙන්වා දී ඇති දෙමළ ජාතික සංවිධානය ජනාධිපතිවරණයක් පැවැත්වීම හඳුන්වා දී ඇත්තේ “වංචනික ක්‍රියාවක්” ලෙසයි.

“එමනිසා, ජනතා තීන්දුවට එරෙහිව යන මේ ක්‍රියාදාමයට හවුල් විය යුතුද යන්න මේ සංධිස්ථානයේ දී තීරණය කළ යුතුව ඇති අතර අනික් ප්‍රශ්නය වන්නේ මෙය නීත්‍යානුකූල ක්‍රියාදාමයද යන්නයි,” යනුවෙන් ආර් සම්බන්ධන් මන්ත්‍රීවරයා විදේශීය දූත මණ්ඩලය හමුවේ ප්‍රකාශ කර තිබේ.

පසුගිය ජනාධිපතිවරණයේ දී ඡන්දදායකයන් ගෙන් 90% ක්ම අලුත් ව්‍යවස්ථාවක් වෙනුවෙන් කැමැත්ත පල කර තිබුනත් එම වරම ක්‍රියාත්මක නොකළ බවට දෙමළ ජාතික සන්ධාන (TNA) නායකයා වර්තමාන ආණ්ඩුවට දොස් පවරා ඇත.

“1988 දී 13 වැනි ව්‍යවස්ථා සංශෝධනය ව්‍යවස්ථා ගත කිරීමෙන් ගතවූ තිස් අවුරුද්ද ඇතුලත අලුත් ව්‍යවස්ථාවක් සකස් කරගැනීම වෙනුවෙන් බොහෝ කටයුතු සිදුවී ඇත. මේ සම්බන්ධයෙන් යෝජනා කිහිපයක්ම ලබා දී තිබුනත් ඒ එකක්වත් ඉෂ්ඨ කර නැත. මේ මොහොතේ රටට අවශ්‍ය වී ඇත්තේ ජනාධිපතිවරණයක් නොව අලුත් ව්‍යවස්ථාවකි.”

ආර් සම්බන්ධන් සමග සාකච්ඡාවට සහභාගිවූ යුරෝපා සංගම් දූත මණ්ඩලයට නායකත්වය ලබා දුන්නේ ප්‍රජාතන්ත්‍රවාදය සහ මැතිවරණ නිරීක්ෂණ ප්‍රතිපත්ති නිලධාරී රිකාර්ඩෝ චෙල්ලේරි සහ දේශපාලන, වෙළෙඳ හා සන්නිවේදන අංශයේ නියෝජ්‍ය නායිකා ඈන් වෝගියර් චැටර්ජී බව දෙමළ ජාතික සන්ධානය පවසයි.