නව දුම්රිය බලවේග කට්ටලයක් කොළඔ වරායට

Report
2Shares

අමෙරිකානු ඩොලර් මිලියන 10.3 ක් විටිනා චීනයෙන් ආනයනය කළ අති නවීන එස් - 14 බලවේග කට්ටල දුම්රියක් අද (13) කොළඹ වරායෙන් ගොඩබෑ ඇතැයි ප්‍රවාහන හා සිවිල් ගුවන්සේවා අමාත්‍යංශය පවසයි.

උඩරට දුම්රිය මාර්ගයේ ධාවනය කිරීම සඳහා විශේෂයෙන් සැකසු මෙම බලවේග කට්ටලයත් සමගින් මේ වනවිට බලවේග කට්ටල නවයක් ලංකාවට ගෙන ඒමට නියමිතය.

අමෙරිකානු ඩොලර් මිලියන10. 3 ක් වන අතර , රුපියල් මිලියන 1839.5ක් වටිනා අති නවින අති නවීන එස් - 14 බලවේග කට්ටලයක එංජින් දෙකක් ඇත.

වායුසමනය කළ මැදිරි දෙකකින්ද දෙවැනි පංතියේ මැදිරි දෙකකින්ද තුන්වැනි පංතියේ මැදිරි තුනකින්ද එය සමන්විත වෙයි.

භෝජන මැදිරියක්ද ඒ අතරේ ඇත.

ඉදිරි දින කිහිපයේදී මෙම බලවේග කට්ටලය පරීක්ෂණ ධාවනයට යොමු කිරීමෙන් පසුව උඩරට දුම්රිය මාර්ගයේ ධාවනයට යොදවන බව දුම්රිය සාමාන්‍යධිකාරී ඩිලන්ත ප්‍රනාන්දු මහතා පවසයි.

උඩරට දුම්රිය මාර්ගයේ දිගු මැදිරි සහිත දුම්රිය හෝ බලවේග කට්ටල ධාවනය කිරීම පහසු නොවන්නේ එම මාර්ගය බෑවුම් සහිත සහ වංගු සහිත වීම නිසාය.

මේ හේතුවෙන් උඩරට මාර්ගයේ දුම්රිය ධාවනය කිරීමේදී දුම්රිය හිඟයකට දුම්රිය දෙපාර්තමේන්තුව මුහුණ දී සිටී.

ඊට පිළියමක් වශයෙන් එම මාර්ගයේ ධාවන කළ හැකි බලවේග කට්ටල නවයක් චීනයෙන් ආනයනය කිරීමට ප්‍රවාහන සහ සිවිල් ගුවන්සේවා අමාත්‍යාංශයේ මැදිහත් වීමෙන් දුම්රිය දෙපාර්තමේන්තුව විසින් කටයුතු කෙරිණ.

අද මෙරටට ගොඩබෑවේ එයින් එක් කට්ටලයකි.

ඉතිරි අට ඉදිරි දින කිහිපයේදී ලංකාවට රැගෙන ඒමට නියමිතව තිබේ.

එම බලවේග කට්ටල අතර වායු සමනය කළ මැදිරි හතරකින් යුක්ත බලවේග කට්ටල තුනක්ද වෙයි.

එම බලවේග කට්ටල යොදා ගනිමින් නගරාන්තර දුම්රිය සේවාවක් ආරම්භ කිරීමටද දුම්රිය දෙපාර්තමේන්තුව අපේක්ෂා කරන බවද ඩිලන්ත ප්‍රනාන්දු මහතා පවසයි.