විධායක ජනාධිපති ක්‍රමය අහෝසි කිරීමේ අගමැති යෝජනාවට ආණ්ඩුවේ බහුතරය විරුද්ධයි | VIDEO

Report
3Shares


ශ්‍රී ලංකාවේ විධායක ජනාධිපති ධුරය අහෝසි කිරීමට අමාත්‍ය මණ්ඩලයේ බහුතරය විරෝධය පල කර තිබේ.

හදිසියේ කැඳවන ලද කැබිනට් මණ්ඩල රැස්වීමක් හමාරවී පිටතට පැමිණි අමාත්‍යවරුන් ගණනාවක්ම මාධ්‍යවේදීන්ට කියා සිටියේ විධායක ජනාධිපති ධුරය අහෝසි කිරීමට අග්‍රාමාත්‍යවරයාගේ පාර්ශවයෙන් කෙරුනු යෝජනාවක් “ඇති බහුතරයක්” විසින් ප්‍රතික්ෂේප කරන ලද බවයි.

ජනාධිපතිවරණයට දින නියම කර තිබියදී එවන් යෝජනාවක් ඉදිරිපත් කිරීම “නින්දිත ක්‍රියාවක්” ලෙස සජිත් ප්‍රේමදාස අමාත්‍යවරයා විසින් හෙලා දකින ලදී.

එම යෝජනාව "ලහි ලහියේ ගෙන ඒමට" මුල් වූයේ අගමැති රනිල් වික්‍රමසිංහ යයි තමන් “හොයාගත්” බව කී අමාත්‍ය රවුෆ් හකීම් එය හැඳින්වූයේ රට අස්ථාවර කිරීමේ වෑයමක් ලෙසයි.

ඉදිරි ජනාධිපතිවරණය සඳහා "දිනන අපේක්ෂකයෙක්" ඉදිරිපත් කර තරග වැදිය යුතු බව එක්සත් ජාතික පෙරමුණ නියෝජනය කරන අමාත්‍යවරු බහුතරයකගේ මතය වූ බව වැඩි දුරටත් ප්‍රකාශයට පත් විය.

මෙම යෝජනාව "එක්සත් ජාතික පක්ෂයේ සහ පොහොට්ටුවේ කුමන්ත්‍රණයක් දැ," යි කැබිනට් මණ්ඩලය තුල සැක පහල කෙරුණු බව මනෝ ගනේෂන් අමාත්‍යවරයා කියා සිටියේය.

TNA විරෝධය

විධායක ජනාධිපති ධුරය රැකගැනීමට ආණ්ඩුවේ බහුතරය ගත් තීන්දුව ශතවර්ෂ කාලක් තිස්සේ දුන් පොරොන්දු අතහැර දැමීමක් ලෙස දෙමළ ජාතික සන්ධානය විසින් කලකිරීමෙන් යුතුව හෙලා දැක තිබේ.

එම් ඒ සුමන්දිරන් මන්ත්‍රීවරයා සමාජ මාධ්‍ය ජාල ඔස්සේ පවසා ඇත්තේ එය “යහපාලකයන්ගේ අවස්ථාවාදයේ හා ආත්මාර්ථයේ උපරිමය ” බවයි.

මැතිවරණය සඳහා දින නියම කිරීමෙන් අනතුරුව විධායක ජනාධිපති ධුරය අහෝසි කිරීමට පියවර ගත නොහැක්කේ මන්දැයි කැබිනට් බහුතරය නියෝජනය කරන අමාත්‍යවරුන් පැහැදිලි කළේ නැත.