ඉරාන ඇමෙරිකා යුධ තත්ත්වයක් ඇතිවුවත් ඉන්ධන තොග ඇති තරම් -ඇමති මහින්ද අමරවීර

Report
1Shares

හිගයකින් තොරව පාරිභෝගිකයිනට ඉන්ධන ලබාදීමට අවශ්‍ය තොග ඉන්ධන සංචිත සතුව පවතින බව ලංකා ඛනිජ තෙල් සංස්ථාව අවධාවරණය කරයි.

දැනට උද්ගතවී ඇති ගල්ෆ් කලාපයේ අර්බුදය හරහා ඉරානය සහ ඇමරිකාව අතර යුධ තත්ත්වයක් පැනනැගුනහොත්, ශ්‍රී ලංකාව තුළ ඉන්ධන සැපයුමට බලපෑමක් එල්ල වියහැකිද? යන්න පිළිබදව විශේෂ සාකච්ඡාවක්, අද පෙරවරුවේ ඛනිජ තෙල් අමාත්‍යාංශයේදී පැවැත්විණි.

ප්‍රවාහන කලමනාකරණ, විදුලිබල හා බලශක්ති අමාත්‍ය මහින්ද අමරවීර මහතාගේ ප්‍රධානත්වයෙන් පැවති එම සාකච්ඡාවේදී මේ සම්බන්ධයෙන් සමාලෝචනය කෙරුණ අතර කිසිදු හිඟයකින් තොරව ඉන්ධන සැපයුමට අවශ්‍ය පරිදි ඉන්ධන තොග පවතින බවත්, ඉදිරි කාලය තුලදී ඉන්ධන රැගත් නෞකා කිහිපයක් දිවයිනට පැමිණීමට නියමිත බවත්, ලංකා ඛනිජ තෙල් නීතිගත සංස්ථාව කරුණු පැහැදිළි කළේයය.

ඒ අනුව දින 19 කට ප්‍රමාණවත් පරිදි ඉන්ධන තොග මේ වනවිට ඛනිජ තෙල් සංස්ථාව සතුව පවතී. එමෙන්ම මෙම මස 17 සහ 18 යන දෙදින තුළ ඉන්ධන ටොන් 16.000ක්ද, මෙම මස 24 සහ 25 යන දෙදින තුළ ඉන්ධන ටොන් 15,000 ක්ද, රැගත් නෞකා දිවයිනට පැමිණීමට නියමිතය. එමෙන්ම යුධ ගැටුමක් ඇතිවුවහොත්, ගල්ෆ් කලාපය තුළ නාවික ගමනා ගමනයට අපහසුතාවක් ඇතිවිය හැකි බැවින්, සිංගප්පූරුව සහ මැලේසියාවෙන් ඉන්ධන තොග ලබාගැනීමටද ලංකා ඛනිජ තෙල් සංස්ථාව මේ වනවිට සැලසුම් කර තිබේ.

එමෙන්ම හම්බන්තොට වරාය ආශ්‍රිතව පවතින ඉන්ධන ටොන් 71,000 ක් ගබඩාකර තබාගත හැකි ඉන්ධන ටැංකි, අමතර ඉන්ධන ධාරිතාවන් රඳවා ගැනීම සදහා භාවිත කරන ලෙස ඇමතිවරයා උපදෙස් දුන්නේය. දැනට එම ටැංකි සංකීර්ණය චීනය සතුවන අතර චින බලධාරීන් සමග සාකච්ඡා කර අමතර ඉන්ධන තොග පිරවීම එම පාර්ශවය මගින් හෝ සිදු කිරීමට පියවර ගන්නා ලෙස දැනුම් දුන්නේය.

කෙසේ වුවද ඇතැම් පිරිස් ඉන්ධන හිඟයක් ඇති වෙතැයි නිරන්තරයෙන් අමාත්‍යාංශයෙන් විමසීම් කරන නමුත්, කිසිදු ඉන්ධන හිගයක් ඇති නොවන අතර ඉදිරි දින 19 කට අවශ්‍ය තරම් ඉන්ධන තොග මේ වනවිටත් ලංකා ඛනිජ තෙල් නීතිගත සංස්ථාව සතුව පවතී.

දැනට පවතින තොග අනුව පෙට්‍රල් 92 - ටොන් 47947 ක්, පෙට්‍රල් 95 - ටොන් 16,000 ක්, ලංකා ඔටෝ ඩීසල් - ටොන් 111957 ක්, සුපර් ඩීසල් - ටොන් 4463 ක්, ගුවන් යානා ඉන්ධන - ටොන් 38086ක්, දැවි තෙල් - ටොන් 70130 ක්ද ව‍ශයෙන් ගබඩා කර තිබේ. මෙම ප්‍රමාණයන්ට ඉදිරියේදී දිනයිනට ලැබිමට නියමිත තොග ඇතුලත් නැත.

මේ වනවිට පවතින ඛනිජ තෙල් තොග පිළිබදව අද පස්වරුවේ පැවැත්වෙන ඇමති මණ්ඩල සාකච්ඡාවේදී දැනුවත් කිරීමට පියවර ගන්නා බව ප්‍රවාහන කලමනාකරණ, විදුලිබල හා බලශක්ති ඇමති මහින්ද අමරවීර මහතා ප්‍රකාශ කළේය.